Minna Salt Minni Sykur HeilkornKjotMjolkurmynd

Hér fyrir neðan eru nokkrar hugmyndir um það hvernig þú getur borðað hollari mat án mikillar fyrirhafnar.

Brauð og kornvörur

Veldu gróf heilkorna brauð í staðinn fyrir hvít og milligróf brauð. Brauð sem eru merkt með Skráargatinu og/eða heilkornamerki eru yfirleitt grófari og innihalda minna salt en sambærileg brauð.

   

Veldu bygg, hýðishrísgrjón og heilkornapasta í stað fínunninna vara sem meðlæti með mat.

Ostur

Veldu fituminni ost, t.d. 17% ost og smurost, í staðinn fyrir feitari tegundir. Ef fæðið er að öðru leyti í samræmi við ráðleggingar um mataræði er rúm fyrir hóflega neyslu feitari osta.

Mjólk

Veldu fjörmjólk, undanrennu eða léttmjólk í staðinn fyrir nýmjólk til drykkjar.

Jógúrt og skyr

Veldu sem oftast fituminni, ósykraðar mjólkurvörur án sætuefna, í staðinn fyrir sykraðar, feitari mjólkurvörur.

Þú getur minnkað sykurneyslu með því að velja markvisst vörur með minni eða engum viðbættum sykri. Kíktu á sykurmagn.is til að kynna þér magn af viðbættum sykri í ýmsum vörum.

Olíur

Notaðu jurtaolíur við matargerð og út á salöt, t.d. rapsolíu og ólífuolíu, í staðinn fyrir smjör, smjörlíki eða kókosfeiti. Með því að auka hlut mjúkrar fitu á kostnað mettaðrar fitu má draga úr hættu á hjarta- og æðasjúkdómum. 

Drykkir

Veldu sem oftast vatn til drykkjar í staðinn fyrir gos- og svaladrykki því vatn er besti svaladrykkurinn. 

Í hálfum lítra af sykruðum gosdrykk eru u.þ.b. 25 sykurmolar eða 50 grömm af sykri en í sama magni af vatni/kolsýrðu vatni er enginn sykur.

Hefur þú kíkt á sykurmagn.is og séð hversu mikið magn af viðbættum sykri er í algengum gosdrykkjum?

Morgunkorn

Veldu múslí úr heilkorni með sem minnstum sykri og sömuleiðis morgunkorn í staðinn fyrir fínni og sætari tegundir.

Veldu tegundir sem eru merktar með Skráargatinu og/eða heilkornamerkinu því þær tegundir eru yfirleitt grófari og innihalda minni sykur og salt en sambærilegar tegundir.

Hefur þú kíkt á sykurmagn.is og séð hversu mikið magn af sykri er í algengum morgunkornstegundum?

Sælgæti og snakk

Hefur þú prófað að fá þér hnetur, fræ, grænmeti eða ávexti í staðinn fyrir sælgæti, kökur, kex eða snakk?
Hefurðu prófað ávaxtasalat með hnetum, fræjum eða smávegis af rifnu dökku súkkulaði?
Ef þú borðar snakk veldu þá saltminni tegundir og hafðu skammtinn lítinn.

Salt

Veldu frekar matvæli sem eru nær uppruna sínum því tilbúin matvæli eru yfirleitt saltríkari. Lestu utan á umbúðir matvæla  -  veldu sem oftast saltminni kostinn.

Takmarkaðu notkun salts við matargerð því fjöldi annarra krydda og kryddjurta getur kitlað bragðlaukana. Ferskar og þurrkaðar jurtir eru bragðmiklar, en athugaðu að kryddblöndur innihalda oft mikið salt.

Veldu skráargatsmerktar vörur því þær innihalda yfirleitt minna salt.