2014_ahrifreykinga

Hrukkur myndast miklu fyrr hjá fólki sem reykir vegna þess að nikótín dregur úr blóð- og súrefnisstreymi til húðarinnar. Auk þess minnkar teygjanleikinn í bindivefnum í undirhúðinni sem heldur yfirhúðinni á sínum stað. Þess vegna fer húðin í andliti að slappast og síga.

Erfðir og sólbaðssiðir geta aukið eða dregið úr áhrifum reykinganna og sá sem hættir að reykja verður var við breytingar til bóta.

Greint hefur verið frá því að óæskilegur hárvöxtur hafi verið 50% algengari hjá konum sem reyktu en hinum sem reyktu ekki.

Árangur reykingamanna er 20-30% lakari en reyklausra þegar kemur að vöðvavexti og betra þoli við líkamsþjálfun og þeir fá sem sagt minna út úr þjálfuninni.

Reykingamenn „eyða“ mun meira af mikilvægum vítamínum en reyklausir, einkum C-vítamíni, B-vítamíni og E-vítamíni. B-vítamín er mikilvægt til að brenna fitu og breyta kolvetnum í orku. E-vítamín ver líkamann fyrir hættulegum eiturtegundum.

Þegar þú hættir að reykja fær húðin frísklegra yfirbragð og hárið glansar meira. 

 

Tóbakslaus án þess að þyngjast

Viltu hætta að reykja en óttast að þú þyngist? Það er ekki jafn erfitt að forðast aukakílóin þegar maður hættir að reykja eins og þú kannski heldur. Ef þú gerir þér góða grein fyrir hvað þú borðar og gætir þess jafnframt að hreyfa þig aðeins meira en meðan þú reyktir þá er alls ekki víst að þú þyngist nokkuð. Rannsóknir sýna að mest hættan á að þyngjast er fyrstu þrjá mánuðina áður en líkaminn er búinn að stilla sig inn á eðlilegan bruna. Nikótínlyf geta gert gagn til að koma í veg fyrir að fólk þyngist meðan mestu breytingarnar ganga yfir.

Þegar fólk reykir eykst efnaskiptahraðinn og það brennir þá 10% meiri orku á meðan líkaminn bregst við efnunum í sígarettunni. Þetta þýðir hins vegar ekki að hægt sé að nota reykingar til að léttast. Líkaminn lagar sig nefnilega fljótt að nýja brennslustiginu.

 

Svona geturðu forðast að þyngjast þegar þú hættir að reykja:

Þegar þú hættir að reykja stillir líkaminn sig inn á að fara yfir í eðlilega þyngd. Bruninn minnkar um 10% fyrsta kastið en það svarar nokkurn veginn til 140-210 kaloríum.

Það má hafa áhrif á líkamsbrunann með tvennu móti til að þyngjast ekki: með því að hreyfa sig meira og borða hóflega. Þannig má stýra bæði orkunáminu og orkueyðslunni. Vertu líka alltaf með vatn við höndina. Vatnsdrykkja hjálpar til við að hreinsa nikótínið úr líkamanum og vinnur gegn þyngdaraukningu. Mikilvægt er að borða máltíðir reglulega. Forðastu að láta mat koma í staðinn fyrir reykinn. Hálftíma líkamsáreynsla á dag brennir þessum auka 140-210 kaloríum. Þú getur til dæmis farið út að hjóla eða í röska gönguferð.

Líkamsáreynsla hefur meðal annars áhrif á eðlilega stjórnun matarlystarinnar og hjálpar því gegn reykingalönguninni. Finndu þér líkamsrækt sem þú kannt við. Þetta á að vera létt og skemmtilegt. Það er heildarlíkamshreyfingin sem segir til um orkueyðsluna. Ef þú setur meiri hreyfingu inn á dagskrána færðu heilmikið að launum án þess að borga krónu. Áhrifamesta líkamshreyfingin felst í að beita stórum vöðvahópum, t.d. við að ganga, hjóla, synda o.s.frv.

Líkamslínurnar

Reykingar vinna gegn áhrifum estrógen-kvenhormónanna þannig að karlhormónin verða tiltölulega áhrifameiri. Þetta getur breytt fitudreifingunni hjá konum sem reykja. Þær geta fengið karllegri líkamslínur, þar sem mittið þykknar miðað við mjaðmirnar. Slík fitudreifing er einn af áhættuþáttum hjarta- og æðasjúkdóma.

2014_hlaupa